விஜயகாந்த் + காங்கிரஸ் + விஜய் = தமிழகத்தில் ஆட்சி?

"திராவிடக் கட்சிகளுடன் கூட்டணி இல்லாமல் தமிழகத்தில் மீண்டும் காங்கிரஸ் ஆட்சியை அமைக்க வேண்டும்' என, மாஜி மத்திய அமைச்சர் இளங்கோவன் அடிக்கடி வேண்டுகோள் விடுத்து வருகிறார். புதிய இளைஞர்களை கட்சியில் சேர்த்து, தமிழகத்தில் காங்கிரஸ் தலைமையில் ஆட்சி அமைக்க வேண்டும் என்ற ஆர்வம் காங்கிரஸ் பொதுச்செயலர் ராகுலுக்கும் லட்சியமாக உள்ளது.

அதனால், தமிழகத்தைச் சேர்ந்த மூத்த தலைவர்கள், மாஜி இளைஞர் காங்கிரஸ், மாணவர் காங்கிரஸ் தலைவர்கள் ஆகியோரை அழைத்து அவர்களின் கருத்துக்களை ராகுல் கேட்டறிந்து வருகிறார். தமிழக மக்களின் ஒட்டு மொத்த ஓட்டுகளை கவரும் வகையில் சினிமா பிரபலங்களை காங்கிரஸ் கூட்டணியில் இணைத்து வலுசேர்க்கவும் முடிவு செய்யப்பட்டுள்ளது. இதற்கான ரகசிய திட்டத்தை தீட்டி, மாஜி மத்திய அமைச்சர் ஒருவர் ராகுலுக்கு இ-மெயில் மூலம் அனுப்பியுள்ளார்.அவரது திட்டத்தின் முதல் கட்டமாக புதுச்சேரியில் விஜய் மக்கள் இயக்கம் சார்பில், கடந்த 23ம் தேதி நடந்த நலத்திட்ட உதவி வழங்கும் விழாவில், முதல்வர் வைத்திலிங்கம் சிறப்பு விருந்தினராக கலந்து கொண்டார். "அரசியலில் நுழைய விருப்பம். வர வேண்டிய நேரத்தில் சரியாக வருவேன்' என தனது ரசிகர்களுக்கு அரசியல் ஆசையை தூண்டி பேசினார் நடிகர் விஜய்.இந்த விழாவில் புதுச்சேரி முதல்வர் வைத்திலிங்கம் பேசும் போது, "மாணவ, மாணவிகளுக்கு விஜய் அதிகமான அறிவுரைகளை கூறியுள்ளார். அவற்றை முறையாக பின்பற்றி நடந்து கொள்ள வேண்டும்' என வேண்டுகோள் விடுத்தார்.

"காங்கிரசுடன் கூட்டணி வைக்கத் தயார்' என தே.மு.தி.க., தலைவர் விஜயகாந்தும் பேசியுள்ளது, தமிழக காங்கிரசாருக்கு உற்சாகத்தை கொடுத்துள்ளது.
காங்கிரசை பலப்படுத்தி, தனித்து போட்டியிடும் வகையில், மாற்றியமைக்க ராகுல் ஒருபுறம் முயற்சி எடுத்து வரும் நிலையில், தற்போதுள்ள தி.மு.க., கூட்டணியில் இருந்து வெளியேறுவதற்கு இன்னொருபுறம் அச்சாரம் போடப்பட்டு வருகிறது."கூட்டணி தர்மத்திற்காக தி.மு.க., வை அனுசரிக்கிறோம், தமிழகத்தில் ஓராண்டுக்கு முன் 2010ம் ஆண்டில் சட்டசபை தேர்தல் நடத்த தி.மு.க., முடிவு செய்துள்ளது. பணத்தால் எதையும் சாதித்து விடலாம் என தி.மு.க., நினைக்கிறது. திராவிட கட்சிகளுடன் கூட்டணி வைப்பது தொடர்ந்து நமக்கு சரிவு தான் ஏற்படும்' என்று வேலூர் லோக்சபா தொகுதி இளைஞர் காங்கிரஸ் உறுப்பினர் சேர்க்கை கூட்டத்தில் ஞானசேகரன் பரபரப்பாக பேசினார்.

தமிழகத்தில் காங்கிரசை பலப்படுத்த ராகுல் எடுத்துவரும் முயற்சியின் ஒருபகுதியாகவே ஞானசேகரன் இப்படி பேசியதாக கூறப்படுகிறது. சட்டசபை தேர்தலில், தி.மு.க., கூட்டணி தொடருமா? என்ற கேள்வியை ஞானசேகரன் எழுப்பியுள்ளார்.டில்லியிலும் காங்கிரஸ் - தி.மு.க., தலைவர்கள் இடையே சுமூக உறவு இல்லை என கூறப்படுகிறது. இப்படி பல்வேறு திரைமறைவு அரசியலுக்கு மத்தியில், தமிழகத்தில் சுற்றுப் பயணம் மேற்கொள்ள ராகுல் திட்டமிட்டுள்ளார். காங்கிரஸ் கட்சி வளர்ச்சி மற்றும் தே.மு.தி.க., தலைவர் விஜயகாந்த், நடிகர் விஜயுடன் புது கூட்டணி அமைப்பது காங்கிரசுக்கு தமிழகத்தில் வெற்றியை தேடித் தரும் என்ற கருத்தை மாஜி மத்திய அமைச்சரின் ஆதரவாளர்கள் தெரிவித்து வருகின்றனர்.ராகுல் திட்டம் மற்றும் காங்கிரசாரின் விருப்பங்கள் எந்த அளவுக்கு பலனை அளிக்கப் போகின்றன என்பது விரைவில் தெரியவரும்.

சிறைகளில் தமிழ் இளைஞர்கள்? - சட்ட அமைச்சகத்திற்கு உச்ச நீதிமன்றம் உத்தரவு!

பயங்கரவாத தடுப்புச் சட்டத்தின் கீழும், சந்தேகத்தின் பேரிலும் கைது செய்யப்பட்டு பல ஆண்டுகளாக காவலில் வைக்கப்பட்டுள்ள தமிழ் இளைஞர்களை விடுவிப்பது தொடர்பாக ஒரு விசாரணைத் திட்டத்தை தயாரித்து நடைமுறைப்படுத்துமாறு சிறிலங்க சட்ட அமைச்சகத்திற்கு அந்நாட்டு உச்ச நீதிமன்றம் உத்தரவு பிறப்பித்துள்ளது.

முன்னாள் அமைச்சர் ஜெயராஜ் பெர்ணான்டோபுள்ளே கொலைத் தொடர்பாக கைது செய்யப்பட்டு கடந்த ஒன்றரை வருடமாக காவலில் வைக்கப்பட்டுள்ள நீர்கொழும்புப் பகுதியைச் சேர்ந்த ஜே.ஏ. பிரான்சிஸ் என்பவர் தொடர்ந்த அடிப்படை உரிமை மனுவை விசாரித்த சிறிலங்க உச்ச நீதிமன்றம் இந்த உத்தரவைப் பிறப்பித்துள்ளது.

பயங்கரவாத தடுப்புச் சட்டம், சந்தேகத்தின் பேரில் கைது என்று சிறைப்படுத்தப்பட்டுள்ள தமிழ் அரசியல் கைதிகளுக்கு எதிராக ஆதாரங்கள் இருப்பின், அவர்கள் மீது வழக்குத் தொடரவோ, சாட்சிகள் இல்லாத பட்சத்தில் அவர்களை விடுதலை செய்யவோ ஒரு அவசர வேலைத் திட்டத்தை நீதியமைச்சகத்தின் செயலருடன் சேர்ந்து தயாரித்து நடைமுறைப்படுத்துமாறு சட்ட அமைச்சகத்திற்கு உச்ச நீதிமன்றம் உத்தரவு பிறப்பித்துள்ளது.

பிரான்சிஸ் மனுவை விசாரித்த உச்ச நீதிமன்றத் தலைமை நீதிபதி அசோக என்.டி. சில்வா, “பல நூற்றுக்கணக்கான தமிழ் இளைஞர்கள் பயங்கரவாத சந்தேகத்தின் பேரில் கைது செய்யப்பட்டு பல வருடங்களாக விசாரணைகள் எதுவுமின்றிச் சிறைப்படுத்தியிருப்பது நீதியற்றச் செயல்” என்று கூறியுள்ளார்.

சிறிலங்க அரசின் இப்படிப்பட்ட கைதுகள், சிறைப்படுத்தல்கள் காரணமாக நீதிமன்றத்தில் தாக்கல் செய்யப்படும் அடிப்படை உரிமை மீறல்கள் தொடர்பான வழக்குகள் எண்ணிக்கை அதிகரித்துள்ளது என்றும், அதனால் நீதிமன்ற நடவடிக்கைகள் பாதிக்கப்பட்டுள்ளதாகவும் தலைமை நீதிபதி அசோக டி.என்.சில்வா கூறியுள்ளார்.

கொழும்புவில் உள்ள சிறைகளில் மட்டும் இப்படி சந்தேகத்தின் பேரில் கைது செய்யப்பட்டு நான்கு ஆண்டுகளுக்கும் மேலாக சிறையில் வைக்கப்பட்டுள்ள தமிழ்க் கைதிகள் 90 பேர் தங்களை விடுவிக்கக் கோரி சமீபத்தில் கால வரையற்ற பட்டினிப் போராட்டத்தைத் துவக்கியுள்ளனர் என்பது குறிப்பிடத்தக்கது.

ஜாமீனில் எடுக்காத அண்ணனை அடித்து கொலை செய்த தம்பி

திருட்டு வழக்கில் சிறையிலிருந்த போது, ஜாமீனில் எடுக்காத அண்ணனை அடித்து கொலை செய்த தம்பி, கிராம நிர்வாக அலுவலரிடம் சரணந்து தற்போது மீண்டும் சிறையில் அடைக்கப்பட்டார்.

கடலூர் மஞ்சக்குப்பம் நோதாஜி ரோட்டைச்சேர்ந்தவர் ஏழுமலை(57). இவரது மகன்கள் கோவிந்தசாமி(24), சம்பத்(22). இருவரும் புதுச்சேரி காட்டுக்குப்பத்தில் உள்ள தனியார் கம்பெனியில் வேலை செய்து வந்தனர்.ஆட்டோ திருடிய வழக்கில் கடந்த 30ம் தேதி சம்பத் கைது செய்யப்பட்டார். சிறையில் இருந்தபோது, அண்ணன் கோவிந்தசாமி ஒருமுறை கூட பார்க்கவில்லை. ஜாமீனில் எடுக்கவும் முயற்சிக்கவில்லை. தான் பதுங்கியிருந்த இடத்தை போலீசிற்கு காட்டிக் கொடுத்தது கோவிந்தசாமி தான் என்பது தெரியவந்ததால், சம்பத் ஆத்திரமடைந்தார்.

இந்நிலையில், நண்பர்களின் உதவியால் கடந்த 22ம் தேதி ஜாமீனில் வெளியே வந்த சம்பத் வீட்டிற்கு சென்று கோவிந்தசாமியிடம் தகராறு செய்தார். "நீ எனக்கு தம்பியே இல்லை' என கோவிந்தசாமி கூறியுள்ளார். ஆத்திரமடைந்த சம்பத் நேற்று முன்தினம் கன்னியக்கோவிலுக்கு சென்று குடித்துவிட்டு நள்ளிரவு வீட்டிற்கு வந்தார். கதவு பூட்டியிருந்ததால் பின் பக்கமாக சுவர் ஏறி குதித்து, வீட்டிற்குள் சென்று, தூங்கிக் கொண்டிருந்த கோவிந்தசாமியை இரும்பு கம்பியால் அடித்து கொலை செய்தார்.

புதுநகர் போலீசார் தேடி வந்த நிலையில், மஞ்சக்குப்பம் கிராம நிர்வாக அலுவலர் தினகரன் முன் நேற்று காலை சரணடைந்தார். புதுநகர் போலீசில் சம்பத் ஒப்படைக்கப்பட்டு கோர்ட்டில் ஆஜர்படுத்தி கடலூர் மத்திய சிறையில் அடைக்கப்பட்டார்.

விஜயகா‌ந்‌தி‌‌ற்கு ‌சி.‌பி.‌சி.ஐ.டி சம்மன்!!

செ‌ன்னை பனையூ‌ரி‌ல் ச‌மீப‌த்‌தி‌ல் நடைபெ‌ற்ற இர‌ட்டை கொலை வழ‌க்‌கி‌ல் தன‌க்கு தெ‌ரி‌ந்த ‌விவர‌‌ங்களை நே‌ரி‌ல் வ‌ந்து தெ‌ரி‌வி‌க்குமாறு தே.மு.‌தி.க. தலைவ‌ர் ‌விஜயகா‌ந்‌தி‌‌ற்கு ‌சி.பி.சி.ஐ.டி காவ‌ல்துறை‌யின‌ர் தா‌க்‌கீது அனு‌ப்‌பியு‌ள்ளன‌ர்.

பனையூ‌‌ர் த‌ம்‌ப‌தி‌யின‌ர் கொலையில் உண்மையான விசாரணை நடைபெறாது என்றும், வழக்கு விசாரணை நிலையிலேயே குற்றவாளிகள் தப்பிவிடுவார்கள் என்றும் ‌விஜயகா‌ந்‌த் கு‌ற்ற‌ம்சா‌ற்‌‌றி‌யிரு‌ந்தா‌ர்.

மேலு‌ம் இந்த வழக்கு சி.பி.சி.ஐ.டி. விசாரணைக்கு மாற்றப்பட்டிருந்தாலும் அதையும் மக்கள் நம்பத்தயாராக இல்லை எ‌ன்று‌ம் கூ‌றி‌யிரு‌ந்த‌ா‌ர்.

இந்த வழக்கில் காவல்துறை சுதந்திரமாக செயல்படவிடப்படுமா? புலன்விசாரணை நியாயமாக நடைபெறுமா? உண்மையான குற்றவாளிகள் கண்டுபிடிக்கப்படுவார்களா? அவர்கள் ஆளுங்கட்சியில் முக்கிய பொறுப்புகளில் உள்ளவர்களோடு சம்பந்தப்பட்டிருந்தாலும் நடவடிக்கை எடுக்கப்படுமா?

முறையாக குற்றம்சா‌ற்ற‌ப்பட்டு நீதிமன்றத்தின் முன் நிறுத்தப்படுவார்களா? அவர்களுக்கு தக்க ஆதாரங்கள் மூலம் காவல்துறை தண்டனையை பெற்றுத்தர முன்வருமா? எ‌ன்று‌ம் அடு‌க்கடு‌க்காக கேள்விகளை எழு‌ப்‌பி‌‌யிரு‌ந்தா‌ர் ‌விஜயகா‌ந்‌‌த்.

இந்நிலையில் சி.பி.சி.ஐ.டி காவ‌ல்துறை‌யின‌‌ர், இது தொடர்பாக விஜயகாந்துக்கு தா‌க்‌கீது அனுப்பியுள்ளனர். இந்த கொலை தொடர்பாக தெரிந்த தகவல்களை நேரில் வந்து தெரிவிக்குமாறு அந்த சம்மனில் கூறியிருப்பதாக தெரிகிறது.

சி.பி.சி.ஐ.டி காவ‌ல்துறை‌யின‌ரிடமிருந்து சம்மன் வந்திருப்பதையடுத்து, விஜயகாந்த் கட்சியின் அவைத் தலைவர் பண்ருட்டி ராமச்சந்திரன் உள்ளிட்ட மூத்த தலைவர்களோடு ஆலோசனை நடத்தி வருகிறார். இந்த தா‌க்‌கீதுக்கு பதிலளிப்பது தொடர்பாக அவர் ஆலோசனை நடத்தி வருகிறார்.

நடிகர் விஜய் ராஜ்யசபா எம்.பி ஆகிறார்!

வெகு விரைவில் சோனியா காந்தி தலைமையில் காங்கிரஸ் கட்சியில் இணையவுள்ளார் நடிகர் விஜய். இவருக்கு ராஜ்யசபாவில் எம்.பி பதவியும், அகில இந்திய அளவில் காங்கிரஸ் கட்சியில் முக்கிய பதவியும் வழங்கப்பட இருப்பதாக இன்றய இந்திய செய்திகள் தெரிவிக்கின்றன. வரும் 2011 தமிழகத்தில் நடைபெற இருக்கும் சட்டப்பேரவை தேர்தலில் விஜய் முக்கிய பாத்திரம் வகிப்பார் என்றும், ராகுல்காந்தியின் தமிழக சட்டசபை ஆட்சியை பிடிக்கும் கனவை நிறைவேற்ற பாடுபடுவார் என்றும் தெரிவிக்கப்படுகிறது. திமுக ஆதரவாளராக இருந்த விஜய்யின் தந்தை சந்திரசேகர் இப்போது அரசியலில் புதிய அடி வைக்க இந்த வியூகத்தை பயன்படுத்தியுள்ளார். ஏற்கெனவே ஸ்டாலின் மகனின் திரைப்படத்தில் நடிப்பதற்கான சம்பள விவகாரத்தில் கருணாநிதி குடும்பத்திற்கும், விஜய் குடும்பத்திற்கும் முறுகல் ஏற்பட்டதாக செய்திகள் பரவியிருந்தன. இந்த நிலையில் விஜய் எடுத்துவைத்துள்ள அடி அவரைப் பொறுத்தவரை இலாபகரமானதாகவே இருக்கும். மு.கருணாநிதி குடும்பத்திற்கு மதிப்புக் கொடுக்க வேண்டிய நிலை அவருக்கு இல்லை.

ஏற்கெனவே அவர் நடித்த கடைசி மூன்று படங்களும் பலத்த அடி வாங்கியுள்ளன. தற்போது வரும் சிறிய பட்ஜட் படங்கள் பெரிய நடிகர் படங்களின் எதிர் காலத்தை கேள்விக்குறியாக்கியுள்ளது. கந்தசாமி படத்தை ஒரு கோடி பத்து இலட்சத்திற்கு வாங்கிய முதலீட்டாளர் தற்போது 40 இலட்சம் நஷ்டம் என்று கூறுகிறார்கள். இந்த நிலையில் பல கோடிகளை இலகுவாகப் புரட்டும் அரசியல் தளத்திற்குள் விஜய் நுழைவது புத்தி சாதுர்யமானது என்று கருதப்படுகிறது. ஆனால் தமிழகத்தில் செல்லாக்காசாக இருக்கும் காங்கிரசை விஜய்யுடன் ரஜனி, அஜித் இணைந்து சென்றாலும் வெற்றிபெற வைப்பது கடினமாகவே இருக்கும். இருப்பினும் பேரம் படியாவிட்டால் விஜய் பல்டியடிக்கவும் இடமுண்டு.