ஏன் என்று சொல்லுங்கள் பார்ப்போம்?

ஒரு ஊருல ராஜா இருந்தாராம், நல்ல ஆட்சி செய்தாராம்.ஆனால் அவரது அமைச்சரைப் பற்றி அவ்வப்போது அரசால் புரசலாக ஊழல் குற்றச்சாட்டுக்கள் அவர் காதில் விழுந்தனவாம். எந்த அரசாங்கக் காரியமானாலும் அவருக்கு 'வெட்டு' உண்டு என்றார்கள். ஊரெல்லாம், நாடெல்லாம் நிலம் வாங்கி குவித்து வருகிறார் என்றார்கள். அவரிடம் தனிக் கருவூலமே இருக்கிறது என்றார்கள். இந்தக் குரல் மெல்ல வலுவடைந்து அரண்மனைப் பக்கம் நகர்ந்து, அரசவையின் அத்தாணி மண்டபத்தையே அடைந்தது ஒரு நாள். ராஜா இனியும் தாமதிப்பது தமக்கே தீங்கு என உணர்ந்து 'விசாரணைக் கமிஷன்' போட்டார்.

கமிஷனின் தீர்ப்பு அமைச்சருக்கு எதிராக அமைந்தது. கடும் சிறை வாசமே தண்டனை என்றாயிற்று. ராஜாவோ பார்த்தார். அந்த அமைச்சர் பரம்பரை, பரம்பரையாக அமைச்சுப் பணியில் இருப்பவர். ஆகவே, அவருக்கு என்ன தண்டனை கொடுப்பது என்று யோசித்தார். 'பளிச்'சென்று ஒரு கருத்து மின்னலிட்டது . அரசவையைக் கூட்டினார். தண்டனையை அறிவித்தார். தண்டனையின்படி மறுநாளே அமைச்சர் இரு உதவியாளர்களுடன் கடற்கரைக்குச் சென்று கூடாரம் அமைத்துக் கொண்டு, கடல் அலைகளைக் கணக்கிட்டு நாள் தோறும் கணக்கு ஒப்புவிக்கவேண்டும் என்பது ஆணை.

"கடல் அலைகளைக் கணக்கிடுவதா. மாட்டிக்கொண்டார் அமைச்சர்" என்று அனைவரும் மகிழ்ந்தனர். அவையே திடுக்கிடும் வகையில் அமைச்சர் உடனே ஒப்புக்கொண்டார். சொன்னபடி மறுநாள் முதல் தனது பணியை நிறைவேற்றத் தொடங்கினார்.

சில நாட்கள் ஆயின. கணக்கு வந்த வண்ணம் இருந்தது. ராஜாவுக்கு சரிவர ஆராயாமல் தண்டனை தந்துவிட்டோமோ என்ற கவலை சூழ்ந்தது. அதே நேரத்தில் 'கிசு கிசு' எந்திரம் 'க்றீ'ச்சிடத் தொடங்கியது. அமைச்சர் முன்பு இருந்ததை விட அதிகமாக லஞ்சம் வாங்குகிறார் என்று வதந்தி பரவியது. உளவுத் துறையைக் கேட்டார். தயக்கத்துடன் 'ஆமாம் 'என்றார்கள். ராஜா யோசித்தார். மாறு வேடம் புனைந்து நேரில் பார்த்து விடுவது என்று முடிவு செய்தார்.

மறுநாள் காலையில் மாறுவேடம் பூண்ட ராஜா கடற்கரை சென்றார். அங்கே அவர் கண்ட காட்சி அவரை திடுக்கிட வைத்தது.

ஏன் என்று சொல்லுங்கள் பார்ப்போம்?

பேசாம கிரிக்கெட் வெளையாட கத்துக்கோங்க!

கிரிக்கெட் வருமானத்தின் இன்னொரு பரிணாம வளர்ச்சியாக, ஐ.பி.எல்., என்ற அமைப்பு துவக்கப்பட்டு, பல ஆயிரம் கோடிகளை குவித்து வருகிறது. ஐ.பி.எல்., கிரிக்கெட் போட்டிகள், கடந்த 12ம் தேதி துவங்கி, 45 நாட்கள் நடக்க உள்ளன. இந்த காலகட்டம், மாணவர்களுக்கு இறுதித் தேர்வு நடக்கும் சமயம். இரவு 12 மணி வரை, மாணவர்களை டிவி-முன் உட்கார வைத்து ஐ.பி.எல்., சம்பாதிப்பதால், மாணவர்களது படிப்பு கடுமையாக பாதிக்கப்படும் என்பதில் சந்தேகமில்லை. அதுமட்டுமா? ஐ.பி.எல்., அமைப்பில் மேலும் இரண்டு அணிகளை சேர்க்கத் திட்டமிட்டுள்ளனர். அதன் மூலம், அடுத்த ஆண்டு 90க்கும் மேற்பட்ட போட்டிகள் நடத்தப்படுமாம். இந்த அணியை வாங்க, குறைந்தபட்ச கேட்புத் தொகை 1,100 கோடி ரூபாயாக நிர்ணயிக்கப்பட்டுள்ளது. இதற்கு மேல், ஏலம் கேட்டு அணியை வாங்க வேண்டும். ஓர் அணிக்கு 1,100 கோடி ரூபாய் என்றால், மொத்தமுள்ள 10 அணிகள் மூலம் எவ்வளவு சம்பாதித்திருக்கும் இந்த ஐ.பி.எல்.,? இந்த சம்பாத்தியத்தின் மூலம் மக்களுக்கு அல்லது ரசிகர்களுக்கு கிடைத்தது ஒன்றுமில்லை. கிரிக்கெட் போட்டிகளைக் கூட, டிவி-யில் இலவசமாக பார்க்க முடியாது. கட்டணச் சேனல்கள் மூலம் ஒளிபரப்பப்படுவதால், ஒவ்வொரு தொடருக்கும் ஒவ்வொரு, டிவி-சேனலுக்கு பணம் கட்ட வேண்டியுள்ளது.

இந்தியாவில் உள்ளது போன்ற கிரிக்கெட் மோகம், வேறு எந்த நாட்டிலும் கிடையாது. கிரிக்கெட் மட்டைகளோடு திரியும் சிறுவர்களை, நாடு முழுவதும் காணலாம். சிறிய காலியிடம் இருந்தால் கூட அங்கு நான்கு பேர், குச்சியை நட்டு கிரிக்கெட் விளையாடிக் கொண்டிருக்கின்றனர். ஒவ்வொரு சிறுவனும், தான் சச்சினாக வேண்டும் என்று கனவு கொண்டிருக்கிறான். ஆனால், நிஜத்தில் அதற்கான வாய்ப்பு எவ்வளவு தூரம் இருக்கிறது என்பது, மிகப் பெரிய கேள்விக்குறி. தேசிய அணியில் அதிகபட்சம் 15 பேர் தான் இடம்பிடிக்க முடியும். சரி, மாநில அணியிலாவது வாய்ப்பு கிடைக்காதா என ஏங்கினாலும், அதில் பெரிய இடத்து பிள்ளைகள் மற்றும் கிரிக்கெட் வாரியத்துக்கு வேண்டப்பட்டவர்கள் தான், எளிதாக நுழைய முடிகிறது.

தென்மாநிலங்களை சுனாமி தாக்கியபோது, கிரிக்கெட் வாரியம் முன்வந்து ஒரு பைசாவாவது செலவிட்டதா? அதேபோல, நாட்டின் பல்வேறு பகுதிகளில் புயல், பூகம்பம் தாக்கியபோதெல்லாம் இந்த கிரிக்கெட் ஹீரோக்களும், வாரியமும் எங்கு இருந்தனர் என்பதே தெரியாது. தமிழகத்தில் சுனாமி தாக்கியபோது, பாலிவுட் நடிகர் விவேக் ஓபராய் தான் இங்கு ஓடோடி வந்து, மக்களோடு மக்களாக தங்கியிருந்து, வீடு கட்டித் தர உதவினார். அதே நேரத்தில், இங்குள்ள ஹீரோக்களும், கிரிக்கெட் மூலம் கோடிகளை சம்பாதித்த ஹீரோக்களும் எட்டிப் பார்க்கவில்லை. இந்தியாவில், "டிவி' மற்றும் நேரடி ஒளிபரப்பு வசதிகள் வருவதற்கு முன், அதாவது, 30 ஆண்டுகளுக்கு முன், மேல்தட்டு பிரமுகர்களின் விளையாட்டாகவே கிரிக்கெட் இருந்தது. "டிவி' நேரடி ஒளிபரப்புடன் ஒரு நாள் கிரிக்கெட் போட்டிகள் தலைதூக்கியதும், மற்ற விளையாட்டுகளை நம் மக்கள் மறந்தே போய்விட்டனர். ஹாக்கி, கால்பந்து போன்ற விளையாட்டுகளை எடுத்துக் கொண்டால், மொத்தமே ஒன்றரை மணி நேரம் தான். போட்டி துவங்கும் முன், இடைவேளை மற்றும் போட்டி முடிந்த பின் என, மூன்று சமயங்களில் மட்டுமே விளம்பரங்கள் செய்ய முடியும். ஆனால், கிரிக்கெட்டில் ஓவர் முடிந்ததும், விக்கெட் விழுந்ததும், பந்து பவுண்டரி தாண்டும்போது, என, நிமிடத்துக்கு நிமிடம் விளம்பரங்கள் ஒளிபரப்பாகின்றன. இதன் மூலம் கிடைக்கும் வருமானமோ, பல கோடி ரூபாய்.

நிலைமை இப்படி இருந்தும், தங்களது குழந்தைகளின் கனவுகளை நிறைவேற்ற பெற்றோர், அவர்களுக்குத் தேவையான கிரிக்கெட் சாதனங்களை பல ஆயிரம் ரூபாய் செலவழித்து வாங்கித் தருகின்றனர். அதுமட்டுமா, இந்த சந்தர்ப்பத்தைப் பயன்படுத்தி, பயிற்சி அளிப்பதாகக் கூறி, பள்ளிகளில் பணம் கறக்கும் நிலைமையும் உள்ளது. குறிப்பாக, கோடைக்கால பயிற்சி முகாம் எனக் கூறி, சிறுவர்களிடம் ஆயிரக்கணக்கில் பறித்து விடுகின்றனர். ஆனால், உருப்படியான பயிற்சி எதையும் அளிப்பதாகத் தகவல் இல்லை. மக்களின் இந்த ஆர்வத்தைப் பயன்படுத்தி, இந்திய கிரிக்கெட் வாரியம் கோடிகளை குவித்து வருகிறது. போதாத குறைக்கு, ஆடு, மாடுகள் போல கிரிக்கெட் வீரர்கள் ஏலம் விடப்படுகின்றனர். உதாரணமாக, தமிழகத்தை எடுத்துக் கொண்டால், சென்னையைத் தவிர சர்வதேச போட்டிகள் நடத்துவதற்கான மைதானம் ஏதும் இல்லை. உலகக் கோப்பைக்காக, சென்னையை ஒட்டி மிகப் பிரமாண்டமான மைதானம் கட்ட, தமிழக அரசிடம் இருந்து நிலம் வாங்கிய கிரிக்கெட் வாரியம், அதை கட்டும் திட்டத்தை கைவிட்டது.

இந்திய கிரிக்கெட் உலகின் ஜாம்பவான் சச்சின் டெண்டுல்கருக்கு, ஒரு கோடி ரூபாய் மதிப்பிலான வெளிநாட்டு பெராரி கார், பரிசுப் பொருளாய் கிடைத்தது. வெளிநாட்டு காரை நேரடியாக இறக்குமதி செய்யும்போது, 100 சதவீதம் வரி கட்ட வேண்டும் என்பது விதி. அந்த வகையில், அவர் கட்ட வேண்டிய வரி, ஒரு கோடி ரூபாய். புண்ணியவான் என்ன செய்தார் தெரியுமா? காரே ஓசி; அதற்கான வரியையும் தள்ளுபடி செய்ய வேண்டும் என எழுதிக் கேட்டு, வாங்கியும் விட்டார். இப்படி வழங்கப்பட்ட கோடிகள், அளிக்கப்பட்ட சலுகைகள் அனைத்தையும் திரும்பப் பெற்று, நாட்டிலேயே அதிகமான வரியை கிரிக்கெட் வாரியத்துக்கு விதிக்க வேண்டும். அதன் மூலம் வசூலாகும் தொகையை, ஏழை மக்களுக்குப் பயன்படுத்தாவிட்டாலும், கிரிக்கெட்டின் வளர்ச்சிக்காவது பயன்படுத்த வேண்டும். அதை விடுத்து, கிரிக்கெட்டைப் பயன்படுத்தி, ஏதோ ஒரு சில தனி நபர்கள் பண முதலைகளாவதை அனுமதிப்பது, மக்களை முட்டாளாக்கும் செயல்.

இப்போதுள்ள கிரிக்கெட் வாரியம், அனைத்தையும் தனது கட்டுப்பாட்டுக் குள் வைத்துக்கொண்டு, தான் மட்டுமே சம்பாதிக்க வேண்டும் என நினைக்கிறது. வாரியத்தில் உள்ளவர்கள், அரசியல்வாதிகள் மற்றும் மிகப் பெரிய நிறுவனங்களின் உரிமையாளர்கள் தான். மாநில மற்றும் தேசிய அளவில் கிரிக்கெட் வாரியத்துக்கான உறுப்பினர், தலைவர் தேர்தலின்போது நடக்கும் அடாவடிகள், வாய் பிளக்க வைப்பவை. கை மாறும் கோடிகள், ஆள் பிடிக்கும் குதிரை பேரங்கள், கோர்ட் படியேறும் கூத்துக்கள் என, அத்தனையும் தடாலடி தான். இப்படி பதவியைப் பிடிக்கும் நபர்கள் யாரும், கிரிக்கெட் வாரியம் மூலம் சம்பாதிக்க வேண்டும் என்ற நிலையில் இருப்பவர்கள் இல்லை. அப்படி இருக்கும் போது, கிரிக்கெட் வாரியம் சம்பாதிக்கும் கோடிகளை, நாட்டின் வளர்ச்சிப் பணிக்கு செலவழிக்கலாம் அல்லது ரசிகர் பயனடையும் வகையில், அவர்களிடம் குறைந்த கட்டணம் வசூலித்தல், இலவச பயிற்சிகள், இலவசமாக போட்டிகளை, டிவி-யில் பார்க்கும் வசதி போன்றவற்றை வழங்கலாம். இந்த நடவடிக்கையை எடுக்க வேண்டியது, மத்திய, மாநில அரசுகள் தான். வீரர்கள், வாரியம் என, இவர்கள் சம்பாதிக்கும் ஒவ்வொரு ரூபாய்க்கும் வரியைப் போட்டுத் தாளிக்க வேண்டிய அரசுகள், அவர்களுக்கு வரி விலக்கு அளித்து, சாமானிய மக்களின் வயிற்றில் நெருப்பைக் கொட்டுகின்றன.

சாம்பியன்ஸ் கோப்பையும், காக்கா கதையும்!

இந்திய கிரிக்கெட் அணிக்கு சாம்பியன்ஸ் கோப்பை கிடைக்காமல் போனது பற்றி இப்போது தெருமுனைகளிலும், பஸ் ஸ்டாப்களிலும் பஞ்சாயத்து நடந்து கொண்டிருக்கிறது.

ஏன் தோற்றீர்கள் என தோனியிடம் கேட்டால், தம்மையும் பிரெட் லீயையும் போல பவுலர்கள் யாருமில்லாததுதான் காரணம் என்பார். நமது பந்துவீச்சாளர்களின் பேச்சைப் பார்த்தால், "எப்படிப் போட்டாலும் அடிக்கறாங்கப்பா' என எதிரணியினர் மீது பழிபோடத் தயாராக இருப்பது தெரிகிறது

சிலர் தென்னாப்பிரிக்க பிட்சை காரணம் சொல்வார்கள். வேறு சிலர் டக்வொர்த் லீவிûஸ வம்புக்கு இழுப்பார்கள். இன்னும் சிலர் பந்து, பேட், ஸ்டம்ப் கேமரா, ஷூ, எதிரணியினர் ஹேர்ஸ்டைல், அம்பயரின் தொப்பி, சைடு ஸ்கிரீன், சனிப்பெயர்ச்சி, சீயர் லீடர்ஸ் இல்லாதது என எதையாவது சொல்லி ரசிகர்களை இம்சிப்பார்கள்.

ஆனால், ரசிகர்கள் இப்போது பாகிஸ்தான் வீரர்கள் மீதுதான் கடுங்கோபத்தில் இருக்கிறார்கள். அவர்கள்தானே இந்திய அணியை ஜெயித்தும் கெடுத்தார்கள்; ஆஸ்திரேலியாவிடம் தோற்றும் கெடுத்தார்கள்.

இந்திய அணி தோற்றுப் போனதற்கு வேறு சில காரணங்களும் இருக்கக்கூடும். சமீபகாலமாக இந்திய அணிக்குச் சிறந்த கேப்டன்கள் கிடைக்கவில்லை. கவாஸ்கர், கபில்தேவ், ஸ்ரீகாந்த், அசாருதீன், டெண்டுல்கர், கங்குலி, திராவிட் என யாருமே வெற்றிகரமாக இருந்ததில்லை. இந்திய அணிக்குக் கேப்டனாகிவிட்டால், அவர் சிறந்த கேப்டனாக இருக்கவே முடியாது என்கிற சூழ்நிலை உருவாகிவிட்டது. அப்படியிருக்கையில் சில வெற்றிகளைப் பெற்றதுமே தமது தலைமையால்தான் அணி ஜெயிக்கிறது என்று தோனி எண்ணிக்கொண்டார். அதனால்தானோ என்னவோ, யுவராஜ், சேவக் ஆகியோருடன் முட்டிக் கொண்டார்.

ஆல் ரவுண்டராக ஆட வேண்டும் என்கிற தோனியின் எண்ணம் நியாயமானதுதான். ஆனால், ஆல் இன் ஆல் ரவுண்டராக வரலாற்றில் இடம்பிடிக்கப் போராடும் அவரது நிலையை நினைத்தால் ஆப்பசைத்த குரங்கின் கதைதான் நினைவுக்கு வருகிறது. ஒருவர் கீப்பராகவும் பேட்ஸ்மேனாகவும் ஜொலிக்கலாம். அல்லது பவுலராகவும் பேட்ஸ்மேனாகவும் சிறப்பாகச் செயல்படலாம். கீப்பராகவும் பவுலராகவும் செயல்படுவேன் என அடம்பிடித்தால் எப்படி? வேறு யாராவது கேப்டனாக இருந்தால் இந்த மாதிரியான வாய்ப்பெல்லாம் இவருக்குத் தருவார்களா?

அடுத்தது, ராகுல் திராவிட் வருகையினால் ஏற்பட்ட அசாதாரணமான நிலை. அவரது ஆட்டம் அணிக்குப் பலமா அல்லது பலவீனமா என்பதை திருவுளச் சீட்டு மூலமாகத்தான் அறிய வேண்டும். அந்த அளவுக்கு நன்மையும் செய்கிறார், இம்சையும் செய்கிறார். ரசிகர்கள், எதிரணியினர், அம்பயர் என அனைவரின் பொறுமையையும் அவர் சோதிப்பார். ஆவேசம் வந்தாலன்றி பந்தை செல்லமாகத் தட்டி மட்டுமே பழக்கப்பட்டவர். கிரீஸýக்குள் பந்து கிடந்தாலும் ரன் எடுப்பது போல பாவ்லா காட்டியே கடுப்பேற்றுவார். இதனால், அவரோ அல்லது உடன் ஆடுபவரோ அவுட் ஆகி வெளியேறுவதுதான் மிச்சம். அவரது வருகை அணியின் ரன் சேர்க்கும் முறையை மாற்றிவிட்டது என்பது மட்டும் தெளிவு.

சேவாக்கும் யுவராஜும் தற்செயலாக சாம்பியன்ஸ் கோப்பையில் ஆடவில்லையா, அல்லது தோனி புகழைக் கொஞ்சம் தட்ட வேண்டும் என்று திட்டமிட்டே புறக்கணித்தார்களா எனத் தெரியவில்லை. எப்படியோ தாங்கள் இருவரும் அணியில் இருந்தால்தான் பலம் என்பதை தோனிக்குப் புரிய வைத்துவிட்டார்கள். இதற்காக ஒரு கோப்பையை இழக்க வேண்டுமா?

அடுத்தது, ஐபிஎல் அணியில் எல்லோரும் டி20 ஆட்டங்கள் நிறைய ஆடிவிட்டதால், பழக்கத்தை மாற்ற முடியாமல் தடுமாறுகிறார்கள். 5 ஓவர் தொடர்ந்து வேகப்பந்து வீசுவதும், 10 ஓவர்களுக்கு மேல் பேட் செய்வதும், 50 ஓவர்கள் ஃபீல்டிங் செய்வதும்கூட வித்தியாசமான அனுபவமாக இருந்திருக்கும். இதுவும் அணியின் மோசமான ஃபார்முக்கு காரணம்.

அதற்காக இந்திய அணி, எப்போது நல்ல ஃபார்மில் இருந்தது எனக் கேட்கக்கூடாது. நம் அணி அவ்வப்போது சாம்பியனாகும், பிறகு நோஞ்சான்களிடம் கூடத் தோற்கும். இது நீண்டகால உண்மை. அதை மறந்துவிட்டு, கோப்பையை ஜெயிப்பார்கள் என்று கனாக் காண்பது அறியாமை.

காரணம் எதுவாக இருந்தாலும், இந்திய அணியின் தோல்வி வேறொரு திருப்பத்துக்கான அறிகுறியாக இருக்கலாம் என்றே தெரிகிறது. அசாருதீன் கேப்டனாக இருந்தபோது, அவரிடம் இருந்து வலுக்கட்டாயமாகப் பதவி பறிக்கப்பட்டு டெண்டுல்கரிடம் வழங்கப்பட்டது. பின்னர் அவரிடம் இருந்து பறிக்கப்பட்டு கங்குலியிடமும், பின்னர் திராவிட்டிடம் வழங்கப்பட்டது. கடந்த உலகக் கோப்பையில் தோற்றதும் தோனிக்கு கிரீடம் சூட்டப்பட்டது. இப்படி காகம் வடை திருடிய கதைபோல் ஒருவரிடம் இருந்து மற்றவருக்கு பதவி போய்கொண்டிருக்கிறது.

இது எல்லா அணிகளுக்கும் பொதுவானதுதான் என்றாலும், கேப்டன்கள் அனைவரும் பதவிக்கு வந்ததும் ஃபார்மை பறிகொடுப்பதும், பதவிபோன பிறகு நன்றாக ஆடி தொடர்ந்து அணியில் நீடித்திருப்பதும் இந்திய அணியின் பிரத்யேக அடையாளம். சமீபகால கேப்டன்களில் டெண்டுல்கர் தவிர வேறு யாருக்கும் பதவி போன பிறகு உரிய மரியாதை தரப்படவில்லை.

இப்போதைய நிலையில், காகத்தின் வாயிலிருக்கும் வடையைப் பறிப்பதற்குரிய இன்னொரு தருணம் வந்துவிட்டதாகவே தெரிகிறது. வடையைத் தக்கவைத்துக் கொள்வது காகத்தின் சாமர்த்தியம்.

Thanks: Dinamani

எங்கே போகிறது இந்திய கிரிக்கெட் அணி?

சுமார் 2 ஆண்டுகளுக்குப் பிறகு இந்திய ஒரு நாள் கிரிக்கெட் அணியில் ராகுல் திராவிடைச் சேர்த்திருப்பது முன்னாள் வீரர்களாலும் ஊடகங்களாலும் பெரும் வரவேற்பை பெற்றுள்ளது, 2011 உலகக் கோப்பையை வெல்ல இந்திய அணியை 2007 உலகக் கோப்பை தோல்வியிலிருந்தே தயார் செய்து வருவதாக கூறும் தேர்வு கொள்கைக்கு முரண்பாடாக அமைந்துள்ளது.

அவரது பேட்டிங் திறமை, அணியில் ஒரு வீரராக அவரது பங்களிப்பு ஆகியவற்றில் தன்னை பல்வேறு விதமாக நிரூபித்தவர்தான் திராவிட் என்பதில் ஐயமில்லை. 7-வது பேட்ஸ்மெனையோ, அல்லது கூடுதலாக ஒரு பந்து வீச்சாளரையோ ஒரு நாள் அணியில் சேர்க்கவேண்டிய நிர்பந்தமான காலக் கட்டங்களில் கங்கூலி தலைமியின் கீழ் விக்கெட் கீப்பர் பொறுப்பையும் ஏற்றவர் திராவிட். இந்த பொறுப்பேற்புகளை நாம் ஒரு போதும் மறுக்கப்போவதில்லை.

எனினும் அவரை இரண்டு ஆண்டுகளுக்கு முன்பு ஒரு நாள் கிரிக்கெட் அணியிலிருந்து நீக்கியபோது 2011 உலகக் கோப்பை கிரிக்கெட்டிற்கு ஒரு பலமான அணியை தயார் செய்து, சிறப்பான அணியை உருவாக்கவே நீக்கம் செய்ததாக அணித் தேர்வுக் குழு கூறியது.

இந்த 2 ஆண்டுகளில் மீண்டும் ஒரு நாள் கிரிக்கெட்டில் இடம்பெற திராவிட் என்ன செய்து விட்டார்? ஐ.பி.எல். இருபதுக்கு 20 கிரிக்கெட்டில் சில அபாரமான இன்னிங்ஸ்களை விளையாடினார். இதையும் நாம் மறுப்பதற்கில்லை. ஆனால் ஒரு நாள் சர்வதேச கிரிக்கெட், அதுவும் மினி உலகக் கோப்பை என்று வர்ணிக்கப்படும் ஒரு முக்கியமான தொடருக்கு அணியை தேர்வு செய்யும்போது ஐ.பி.எல். கிரிக்கெட்டில் அவர் காட்டிய திறமையை கணக்கில் எடுத்துக் கொள்வது எப்படி என்று தெரியவில்லை!

ஒரு நாள் போட்டியிலிருந்து தன்னை நீக்கி விட்டதற்கு பாடம் புகட்ட டெஸ்ட் போட்டிகளில் அதிரடி இன்னிங்ஸ்கள் எதையும் விளையாடினாரா? இல்லை. இங்கிலாந்திற்கு எதிராக நடைபெற்ற டெஸ்ட் தொடரில் இவர் கிரகாம் ஸ்வான், ஸ்டூவர்ட் பிராட், ஜேம்ஸ் ஆண்டர்சன் பந்துகளில் சொற்ப ரன்களுக்கு ஆட்டமிழந்தார்.
ஆஸ்ட்ரேலியாவில் கும்ளே தலைமை இந்திய அணி பயணம் மேற்கொண்டபோது சர்ச்சைக்குரிய அந்த தொடரில் அவர் நாம் வெற்றி பெற்ற பெர்த் டெஸ்ட் போட்டியில் முதல் இன்னிங்ஸில் 91 ரன்களை எடுத்தார்.

அதே ஆஸ்ட்ரேலிய அணி மீண்டும் இந்தியா வந்த போதும் திராவிடின் பேட்டிங் அவ்வளவு சிறப்பாக அமையவில்லை. இந்த பேட்டிங் வரலாற்றை வைத்துத்தான் அவரை ஒரு நாள் அணிக்கு தேர்வு செய்வதா வேண்டாமா என்று முடிவு செய்யப்பட்டிருக்கவேண்டும். ஐ.பி.எல். கிரிக்கெட் எவ்வளவுதான் சவாலான ஆட்டமாக இருப்பினும், சர்வதேச கிரிக்கெட்டில் ஒரு வீரருக்கு கொடுக்கப்படும் நெருக்கடி, அழுத்தம் கொடுக்கப்பட மாட்டாது என்பதை முன்னணி வீரர்கள் ஒப்புக் கொண்டுள்ளனர்.

நியூஸீலாந்திற்கு இந்தியா பயணம் மேற்கொண்ட போது பலமான இந்திய 20- 20 அணி இரண்டு போட்டிகளிலும் தோல்வி தழுவியது. ஆனால் இருபதுக்கு 20 தோல்வியை வைத்து ஒரு நாள் கிரிக்கெட்டை நாம் கணிக்க முடியாது என்று பலரும் கூறியது பின்பு இந்தியா நியூஸீலாந்தை 3- 1 என்று வெற்றி பெற்றதன் மூலம் நிரூபணமானது. இப்படியிருக்கையில், இருபதுக்கு 20 போட்டிகளில் அதுவும் உள் நாட்டு 20- 20 தொடரான ஐ.பி.எல். கிரிக்கெட்டில் எடுக்கும் ரன்கள் எந்த அளவிற்கு சர்வதேச ஒரு நாள் கிரிக்கெட்டில் பயனளிக்கும் என்பது தெரியவில்லை.

ஆஸ்ட்ரேலியாவில் நடைபெற்ற முத்தரப்பு ஒரு நாள் தொடரில் வெற்றி பெற்ற பிறகு, இலங்கையில் இரண்டு ஒரு நாள் தொடர், நியூஸீலாந்து தொடர், இங்கிலாந்திற்கு எதிரான தொடர், சமீபமாக மேற்கிந்திய அணிக்கு எதிரான தொடர் என்று திராவிட் இல்லாமல் இந்திய அணி வெற்றி பெற்றுள்ளது. அதுவும் ஒரு சில போட்டிகளில் சேவாகும் இல்லை, சச்சின் டெண்டுல்கரும் இல்லை. இருப்பினும் தொடரை இந்தியா இழக்கவில்லை. மாறாக ஐ.பி.எல். கிரிக்கெட்டில் வரிந்து கட்டி ரன்களை குவித்த வீரர்களுடன் இருபதுக்கு 20 உலகக் கோப்பை போட்டிகளில் இந்தியா தோல்வி தழுவியது. மீண்டும் சேவாக் அணியில் காயம் காரணமாக இடம்பெறமுடியவில்லை.

பின்னால் களமிறங்கி நன்றாக விளையாடக்கூடிய ரோஹித் ஷர்மாவை துவக்க வீரராக களமிறக்கி அவர் சரியாக விளையாடவில்லை என்று கூறி தற்போது அணியிலிருந்து நீக்கியிருப்பது சரியான முடிவாகத் தெரியவில்லை.

அப்படியே அவர் நீக்கப்பட்டிருந்தாலும் அவரது இடத்தில் தொடர்ந்து அபாரமாக விளையாடி வரும் வீரத் கோலியைத்தான் தேர்வு செய்திருக்கவேண்டும், கோலி ஐ.பி.எல். கிரிக்கெட்டில் சில அபாரமான இன்னிக்ஸ்களை விளையாடியதோடு, ஆஸ்ட்ரேலியாவில் சமீபமாக நடைபெற்ற 4 நாடுகளுக்கு இடையிலான எமர்ஜிங் வீரர்கள் ஒரு நாள் தொடரில் இந்திய அணி சாம்பியன் பட்டம் வெல்ல அவரது பேட்டிங்கே முக்கிய காரணமாக அமைந்துள்ளது. அவர் பந்து வீச்சிலும் சிக்கனமானவர். அனைத்திற்கும் மேலாக ஸ்லிப், பாயிண்ட், கல்லி மட்டும் அல்லாமல் எந்த இடத்திலும் அவர் மிகச்சிறந்த ஃபீல்டர்.

கோலி ஒரு எதிர்கால இந்திய வீரர். அவருக்கு வாய்ப்பளிக்காமல் 2 ஆண்டுகளில் எந்த வித ஒரு நாள் கிரிக்கெட்டிலும் பங்கு பெறாத திராவிடை எப்படி தேர்வு செய்ய முடியும்?

ராபின் உத்தப்பாவிற்கு கூட ஒரு வாய்ப்பு அளித்துப் பார்த்திருக்கலாம். ஆனால் கிருஷ்ணமாச்சாரி ஸ்ரீகாந்த், தினேஷ் கார்த்திக் மேல் அதிக நம்பிக்கை வைத்திருக்கிறார். திராவிடிற்கு பதிலாக பத்ரிநாத்தை அணியில் எடுத்திருந்தால் கூட ஒரு நியாயம் இருந்திருக்கும். ஏனெனில் பத்ரிநாத்திற்கு வாய்ப்பே அளிக்காமல், தேர்வு செய்து பல தொடர்களில் ஓய்வறை பார்வையாளராக உட்கார வைக்கப்பட்டுள்ளார். வாய்ப்பு கொடுக்காமலேயே அவர் அணியிலிருந்து நீக்கப்பட்டுள்ளார். இதன் அடிப்படை என்னவென்றும் புரியவில்லை.

ஐ.பி.எல். கிரிக்கெட் இந்தியாவின் மறைந்திருக்கும் இளம் திறமைகளை கண்டுபிடிக்கத்தான் என்று கூறி கொண்டு மீண்டும் 35 வயதான திராவிடிடம் போய் தஞ்சமடைந்திருப்பது தேர்வுக் கொள்கையில் ஏற்பட்டிருக்கும் பின்னடைவு என்பதோடு, இளம் வீரர்களின் நம்பிக்கையையும் தகர்ப்பதாக உள்ளது. அதே போல் காரணமில்லாமல் நீக்கப்பட்டிருக்கும் இடது கை சுழற்பந்து வீச்சாளர் பிராக்யன் ஓஜா. இவரை எமர்ஜிங் அணியில் தேர்வு செய்யாமல், அமித் மிஷ்ராவை தேர்வு செய்தனர். பிராக்யன் ஓஜா விளையாடிய வரையில் எதிரணியினரின் நடுக்கள வீரர்களை குறி வைத்து விக்கெட்டுகளை வீழ்த்தும் திறமையுடையவர் என்பதை நிரூபித்தார். அமித் மிஷ்ராவைக் காட்டிலும் தற்போது அனுபவசாலி ஆனால் அவருக்கு வாய்ப்பு மறுக்கப்பட்டுள்ளது.

ஒரு புறம் இந்திய அணிக்கு நிலைத்தன்மையை ஏற்படுத்த அனுபவம் தேவை. அதாவது திராவிட் தேவை. மறு புறம் அனுபவம் பெற்று சிறப்பாக பங்களிக்க துடிக்கும் பிராக்யன் ஓஜா தேவையில்லை. ஒரு நாள் கிரிக்கெட் விளையாடாத அமித் மிஷ்ரா தேவை. இது போன்ற முரண்பாடுகள் இருக்கிறது என்பதை மட்டும் நாம் பார்த்தால் போதுமானது.

பிரவீண் குமார் மேற்கிந்திய தொடரில் சரியாக வீசவில்லை. ஆனால் அவர் மீண்டும் இடம்பெற்றுள்ளார். மேற்கிந்திய தொடரில் சரியாக விளையாடவில்லை என்பதற்காக ரோஹித் ஷர்மா நீக்கப்பட்டுள்ளார். முனாஃப் படேலுக்காக பேசுவதற்கு ஆளில்லை என்பதனால் அவர் அணித் தேர்வில் பரிசீலிக்கப்படக்கூட இல்லை.

எமர்ஜிங் அணியில் சிறப்பாக வீசியதற்காக அமித் மிஷ்ரா தேர்வு செய்யப்பட்டுள்ளார். எமர்ஜிங் அணியில் சிறப்பாக விளையாடிய வீரத் கோலி தேர்வு செய்யப்படவில்லை. பத்ரிநாத் தேர்வு செய்யப்படவில்லை. தினேஷ் கார்த்திக் அணியில் எப்படி தொடர்ந்து நீடிக்க முடிகிறது என்பது புதிராகவே உள்ளது. திராவிடை மீண்டும் அணியில் தேர்வு செய்திருப்பது பற்றி அனைவரும் வரவேற்பு கொடுத்துள்ள நிலையில் திராவிடின் ஒட்டு மொத்த ஒரு நாள் சர்வதேச கிரிக்கெட் பங்களிப்பையும் நாம் ஒரு விமர்சனப் பார்வைக்கு உட்படுத்துவோம். ஏனெனில் திராவிட் அணிக்குள் வரும்போது வினோத் காம்ப்ளி போன்ற அதிரடி பேட்ஸ்மென் அணியிலிருந்து நீக்கப்பட்டிருந்தார் என்பது குறிப்பிடத்தக்கது. வினோத் காம்ப்ளியின் டெஸ்ட் சராசரி 54 என்பது குறிப்பிடத்தக்கது.

1996ஆம் ஆண்டு ஏப்ரல் மாதம் இலங்கைக்கு எதிராக சிங்கப்பூரில் தன் முதல் ஒரு நாள் போட்டியை விளையாட தொடங்கிய திராவிட் சரியாக 10-வது போட்டியில்தான் பாகிஸ்தானுக்கு எதிராக டொரோன்டோ மைதானத்தில் 90 ரன்களை எடுத்து முதல் அரைசதம் எடுத்தார். அதற்கு அடுத்த அரைசதம் 4 போட்டிகளுக்கு பிறகு தென் ஆப்பிரிக்காவுடன் இந்தியாவில் எடுக்கப்படுகிறது. 62 ரன்களை எடுக்கிறார். இந்தியா தோல்வியடைகிறது. 87 பந்துகளில் 62 ரன்களை திராவிட் எடுக்கிறார். இது பிரச்சனையில்லை. ஆனால் அவ்வளவு நேரம் பந்து வீச்சை பார்த்த சிறந்த வீரர் திராவிட் அந்தப் போட்டியை வென்றிருக்கவேண்டும். ஆனால் இல்லை.

அதன் பிறகும் சில அரை சதங்களை எடுக்கிறார். ஆனால் ஒவ்வொரு அரைசதத்திற்கு இடையிலும் குறைந்தது 4 அல்லது 5 போட்டிகள் இடைவெளி. அதாவது சொற்ப ரன்களில் ஆட்டமிழந்துள்ளார்.

மேலும் உலகக் கோப்பை கிரிக்கெட் போட்டிகளில் அதிக ரன்களை எடுப்பதும், அதிக சராசரியை வைப்பதும் பெரிய விஷயமல்ல. ஏனெனில் சொத்தை அணிகள் அதில் நிறைய இடம்பெறுகின்றன. இங்கிலாந்து, ஆஸ்ட்ரேலியா, தென் ஆப்பிரிக்கா, பாகிஸ்தான், இலங்கை போன்ற பந்து வீச்சு பலமாக உள்ள அணிகளுக்கு எதிராக ஒரு குறிப்பிட்ட ஒரு தினப் போட்டித் தொடரில் சீரான முறையில் ரன்களை திராவிட் குவித்திருக்கிறாரா என்று பார்த்தால் நமக்கு ஏமாற்றமே விஞ்சும்.

1996, 98, 2000, 2007, ஆகிய ஆண்டுகளில் 35 ரன்கள் சராசரியை பராமரிக்க போராடியுள்ளார் திராவிட். மேலும் அவரது உச்சகாலத்தில் கூட எதிரணியினரின் உத்தி வகுப்பு விவாதங்களில் திராவிடை ஒரு பெரிய அச்சுறுத்தலாக எந்த அணியும் கருதவில்லை. சச்சின், சேவாக், யுவ்ராஜ், ஏன் கயீஃப், தினேஷ் மோங்கியா போன்றோர் கூட எதிரணியினரின் உத்தி வகுப்பு விவாதங்களில் ஒரு அச்சுறுத்தலாக பேசப்பட்டிருப்பார்கள். ஆனால் திராவிட் ஒரு நாளும் ஒரு நாள் கிரிக்கெட் போட்டிகளில் எதிரணியினருக்கு சிம்ம சொப்பனமாக திகழ்ந்ததில்லை.

மேலும் ஒரு நாள் கிரிக்கெட்டில் ஒரு போதும் 50 ரன்கள் சராசரியை அவரது உச்சகாலத்தில் கூட திராவிட் வைத்திருந்ததில்லை. தோனி தற்போது ஒரு நாள் கிரிக்கெட் பேட்டிங் தரவரிசையில் சச்சின் டெண்டுல்கருக்கு பிறகு நீண்ட நாட்களுக்கு முதலாம் இடத்தில் நீடிக்கிறார் என்றால் அவரது சீரான ரன் குவிப்புதான் காரணம். 50 ரன்கள் சராசரியையும் வைத்திருந்தார் தோனி. இப்போதும் இவரது சராசரி 50 ரன்களுக்கு சற்றே குறைவு.

தற்போது வந்துள்ள கௌதம் கம்பீர், யூசுஃப் பத்தான், சுரேஷ் ரெய்னா போன்றோரைக் கூட எதிரணியினர் தங்கள் வெற்றிக்கு பங்கம் விளைவிக்கும் அச்சுறுத்தலாகவே கருதுவர். ஆனால் உலகின் எந்த ஒரு முன்னணி கிரிக்கெட் அணியின் கேப்டனையும் அழைத்து திராவிட் பற்றி கேட்டால் ஒரு நாள் கிரிக்கெட்டில் அவர் பேட்டிங் பெரிய அச்சுறுத்தல் இல்லை என்றே கூறுவார்கள். திடீரென அவரை அணியில் தேர்வு செய்து விட்டார்கள் என்பதற்காக அவர் 'லொட்டு' வைத்து நம்மை வெறுப்பேற்றிய காலங்களை நாம் மறக்க முடியாது.

மேலும் இப்போது அணியில் விக்கெட்டுகளுக்கு இடையே வேகமாக ரன்கள் ஓடுவதை ஒரு உத்தியாகவே இந்திய வீரரகள் வளர்த்து வருகின்றனர். திராவிட் இந்த இளம் வீரர்களின் ஓட்டத்திற்கு ஈடு கொடுப்பாரா என்பது சந்தேகமே. இவருடன் ஓட முடியாமல் கம்பீர், ரெய்னா, ஏன் சச்சின் டெண்டுல்கர் போன்றவர்கள் கூட ரன் அவுட் ஆகும் வாய்ப்பு உள்ளது.

சில சமயங்களில் பந்துகளை சாப்பிட்டு எதிர் முனையில் நிற்கும் இளம் வீரர்களுக்கு ஸ்ட்ரைக் கொடுக்காமல் வெறுப்பேற்றும் தருணங்களையும் நாம் மறுக்க முடியாது. இருபதுக்கு 20 க்ரிக்கெட்டில் சில புதிய ஷாட்களை இவர் விளையாடி (அதாவது திராவிடிற்கு அது புதிய ஷாட்) ரன்களை எடுத்தார் என்பதற்காக அதே உத்தியை அவர் வரவிருக்கும் ஒரு நாள் தொடரிலும் கடைபிடிப்பார் என்று நாம் எதிர்பார்க்க முடியாது. ஒரு சில அரை சதங்களை வேண்டுமானால் அவரிடமிருந்து எதிர்பார்க்க முடியுமே தவிர அது அணியின் வெற்றிக்கு முக்கிய பங்களிப்பாக இருக்குமா என்றெல்லாம் நாம் உடனடியாக கூற முடியாது.

ஆகவே அபிஷேக் நாயர் போன்ற வீரர்களை 11-ற்குள் எடுத்து திராவிடை குறைவாக பயன்படுத்தினால் நல்லது என்றே தோன்றுகிறது. மீண்டும் 3-ஆம் இடம் என்ற முக்கிய நிலையில் அவருக்கு நிரந்தரமாக ஒரு இடம் கொடுப்பது என்பது அணியை பின்னடைவிற்கு இட்டுச்செல்லும் என்பது உறுதி. தோனிக்கு இன்று இருக்கும் முக்கிய சவால் என்னவெனில் சாம்பியன்ஸ் கோப்பையை வெல்வதல்ல. திராவிடை எவ்வளவு சிக்கனமாக பயன்படுத்துகிறார் என்பதிலேயே உள்ளது.